El cuerpo

Izenburua: El Cuerpo (The Body).

Egilea: Hanif Kureishi.

Argitaletxea: Anagrama.

Orrialdeak: 270.

Ingalaterran jaio eta hazirikoa dugu Hanif Kureishi. Londoneko King’s College-ean burutu zituen filosofia ikasketak eta han hasi zen antzerki lanak idazten. Honetaz gainera, kontakizun liburuak, pelikula gidoiak eta eleberriak idatzi ditu, hainbat sari jaso dituelarik.

Ingelesa izan arren, bere familia, edo aita gutxienez, Pakistandarra zen. Honela, familia etorkinen arazo jenerazionalak landu ditu bere obran zehar. Eta lan honetan, etorkinena bakarrik ez, baizik eta guraso ta seme-alaben arteko harreman tirabiratsuak jorratzen ditu behin eta berriro. Harrapaturik dauka arazoak idazlea dirudienez, ezin baitezake bere lanetatik urrundu. Eta hau “My ear at his heart” bere azkeneko eleberrian ikus dezakegu berretsirik.

Liburu honi dagokionez, zazpi atalez osaturik dago: “The Body” eleberri laburrarekin hasi, eta beste sei ipuinek jarraitzen diote. Hasierakoan, gazte baten gorputza jasotzen duen agure batez dihardu, eta honek dakarzkion abentura zein arazoetaz. Beste ipuinei dagokienez, tentsio familiarra ardatz duten kontakizunak direla esango nuke,. borobildurik ez daudenak, baina zer pentsatu ugari ematen dutenak. Batez ere, berak duen arazo berdina dutenetzat.

Honelakoak (“Ciudadano de ninguna parte, habito el País de Follar”) aurkituko ditugun arren, ez dezala irakurleak pentsa eleberriak ez duela barrenik, izan ere, batzutan hain da barnekoia, kosta egiten dela guztiz ulertzea.